Í dag hélt Siglingastofnun opinn fund þar sem kynnt voru drög að reglugerð um starfshætti faggiltra óháðra skoðunarstofa sem annast skoðanir á skipum. Þær skoðunarstofur sem uppfylla ákvæði reglugerðarinnar er m.a. ætlað að skoða öll fiskiskip minni en 400 brúttótonn.
Hér á heimasíðunni hefur komið fram sjónarmið LS á fyrirhuguðum breytingum, https://smabatar.webdev.is/wp-content/uploads/documents/frettir/2003/10/28/117.shtml
Greinilegt er að áhyggjur félagsins sem fram koma í ályktun stjórnar LS eru ekki ástæðulausar því kröfur sem skoðunarstofur þurfa að uppfylla til að fá faggildingu eru miklar og án alls vafa kostnaðarsamar.
Fundurinn var fjölsóttur og greinilegt er að margir hafa áhuga á að ná sér í faggildingu svo þeir öðlist réttindi til skipaskoðunar. Samkeppni ætti því að myndast sem mundi þá gera LS kleift að ná hagstæðum kjörum fyrir félagsmenn. Því er þó ekki að leyna að hinar miklu kröfur sem gerðar eru gætu valdið því að færri muni komast á leiðarenda um að verða sér úti um faggildingu heldur búast mætti við.
Greinilegt er að stjórnvöld vilja tryggja góðan framgang þessa máls sem lýsir sér m.a. ákvæði í reglugerðardrögunum sem heimilar samgönguráðherra að setja gjaldskrá fyrir hámarksgjaldtöku. Auk þessa er ákvæði til bráðabirgða þar sem kveðið er á um að reglugerðin skuli endurskoðuð innan teveggja ára frá birtingu hennar.

Gert er ráð fyrir að hið breytta fyrirkomulag skipaskoðunar taki gildi 1. mars 2004.