Eins og við var að búast eftir síðasta togararall, reiknar Hafró, samkvæmt aflareglu, í nýjustu skýrslu sinni um nytjastofna sjávar og aflahorfur (fjölrit 121) að veiðiheimildir skuli skornar niður úr 205 þúsund tonnum sem þær voru 5-20-2004, í 198 þúsund tonn fyrir komandi fiskveiðiár, eða í kringum 4,5%.
Litlar líkur á aukningu á næstunni
Á kynningarfundi sem Hafró hélt fyrr í dag kom jafnframt fram að miklar líkur eru á því að veiðiheimildir verði ekki auknar á næstu árum, haldi trúlega áfram að hjakka í kringum 200 þúsund tonn. Allar væntingar manna um t.d. 350 þúsund tonna veiði, eins og lengi hefur verið stefnt að eru með öllu óraunhæfar – nema ef nýjar Grænlandsgöngur komi til sögunnar síðar á áratugnum. Reyndar var gerð tillaga á fundinum um að veita bjartsýnisverðlaun fyrir þá ábendingu.
Loðnan finnst í æ minna mæli í þorskmögum
Margt fróðlegt kom fram á þessari kynningu. Eitt af því var stöplarit sem sýndi þróun á innihaldi þorskmaga 55 – 65 cm þorsks í haustralli. Þar er mjög sláandi að loðnan virðist vera á góðri leið með að detta af matseðlinum hjá þeim gula, en hefur til skamms tíma verið veigamikill þáttur fæðu hans að hausti. Þá er og athyglisvert hversu léleg meðalþynd 9 ára þorsks hefur verið s.l. 2 ár. Munar þar um tveimur kg frá meðalþyngd síðan 1970.
Aðspurðir um miklar loðnuveiðar Íslendinga og notkun flotvörpu sögðust Hafrómenn vissulega hafa af þessu áhyggjur og full ástæða til að rannsaka þá hluti.
Hafró skal síður en svo lastað að hafa reynt eftir bestu getu að finna ljós í myrkrinu varðandi þorskinn. Þannig var bent á að viðmiðunarstofninn árið 2006 verði um 50% stærri en hann var 1995. Það er öllu sorglegra að rifja upp að stofninn nú er u.þ.b. jafn stór og þegar lagt var upp með kvótakerfið 1984, nema hvað samsetning hans er mun verri í dag en þá.
Vilja enn frekari niðurskurð
Hafró fer ekki dult með það að takmarka beri enn frekar þorskveiðar. Endurskoða þurfi aflaregluna og voru tölur á bilinu 16% – 22% nefndar og takmarka beri enn frekar veiðar á hrygningarfiski.
Sögulegt hámark ýsu frá 1975
Fari sjávarútvegsráðherra að tillögum Hafró verður ýsukvóti næsta fiskveiðiárs 105 þúsund tonn. Náist sá afli, yrði það mesti ýsuafli Íslendinga frá því fært var út í 200 mílur. Sá galli er á þessari gjöf Njarðar að ýsuverð er löngu hrunið og gangi spár fiskifræðinga eftir fyrir stór hafsvæði annars staðar mun enn frekar syrta þar í álinn.
80 þúsund tonn af ufsa
Hafró leggur til að veidd verði 80 þúsund tonn af ufsa, sem er með því mesta sem gerst hefur á annan áratug. Í steinbít er sama tillaga og í fyrra, 13 þúsund tonn.
‘Umframveiðin’
Það er gömul saga og ný að þegar útskýra á þessa a.m.k. tölfræðilegu erfiðleika þorskins til að ná sér á strik, er ‘umframveiði’ kennt um – veitt hafi verið umfram tillögur fiskifræðinga. Það er því athyglisvert að skoða árabilið 8-19-1997 til 5-20-2004. Á þessu árabili veiddi flotinn 4,5% umfram tillögur Hafró í þorski, en á hinn bóginn 12% í ýsu og hátt í 15% í ufsa.
Fjallað verður frekar um skýrsluna hér á síðunni.
