Síminn á skrifstofu LS hefur hreinlega logað í allan dag vegna markrílfréttar Stöðvar 2 í gærkveldi. Þar var rætt við Sigurð Inga Jóhannsson sjávarútvegsráðherra um stjórnun makrílveiða á næsta ári.  

Í upphafi fréttarinnar segir:  „Makríll verður settur í kvótakerfi á næsta ári og verða heimildirnar miðaðar við aflareynslu skipa og verða með frjálsu framsali, að sögn Sigurðar Inga Jóhannssonar sjávarútvegsráðherra.

Í viðtalinu segir ráðherrra það hafa legið fyrir „um nokkurt skeið að komin sé nægjanleg reynsla á makrílveiðarnar og þar með lagaleg skylda, hvort sem er samkvæmt lögum um stjórn fiskveiða eða úthafsveiðilögunum, að fara þessa leið og við erum að skoða það í ráðuneytinu,.

Síðar í viðtalinu boðar ráðherra sérstaka lagasetningu um makrílveiðarnar þar sem tekið verði tillit til veiðireynslu, verðmætasköpunar og væntanlega einhverra fleiri þátta í samráði við útgerðarmenn jafnt stórra sem smærri útgerða í landinu.

Vegna þessarar fréttar er rétt að taka fram að stefna Landssambands smábátaeigenda er skýr varðandi þessi mál.  Færaveiðum smábáta á makríl eigi ekki að stjórna með kvótasetningu.  Það fyrirkomulag sem gilt hafi á síðasta ári hafi hentað vel, gefið mönnum tækifæri til að þróa veiðarnar og þreifa fyrir sér á mörkuðum.   

Sé horft til Noregs varðandi makrílveiðar hefur reynsla þeirra leitt í ljós að hlutur færaveiða í heildarveiðinni er um 18% heildaraflans sem byggist m.a. á að á þeirra veiðislóð er makríllinn stærri og þar með verðmætari en sá sem veiðist fjær landi.  Reynslan hér á sl. sumri gefur sömu niðurstöðu.

Í ár kom makríll í raun í fyrsta sinn í miklu magni á veiðislóð smábáta.  Á annað hundrað báta reyndu fyrir sér við veiðarnar og gekk veiðin framar vonum, þegar tekið er tillit til að flestir voru í fyrsta sinn að stunda þessar veiðar.   Afli smábáta varð 4.678 tonn í ár, en alls veiddu Íslendingar 137 þús. tonn. 

Markrílbátar í Hólmavíkurhöfn