Eins og fram hefur komið verður 28. aðalfundur Landssambands smábátaeigenda haldinn 18. og 19. október nk. Fundurinn verður í Turninum í Kópavogi og hefst kl 10:00.
Á undanförnum vikum hafa svæðisfélög LS (15 að tölu) haldið aðalfundi sína. Fundirnir hafa verið vel sóttir og eftir föngum hefur verið sagt frá þeim hér á heimasíðunni. Félögin hafa öll samþykkt tillögur sem verða til umræðu á aðalfundi LS.
Rétt til setu á aðalfundi LS hafa allir félagsmenn í LS.
Kjörnir fulltrúar á aðalfundum svæðisfélaganna eru 36 og hafa þeir ásamt stjórn LS, formanni og framkvæmdastjóra atkvæðisrétt á aðalfundinum. Aðrir félagsmenn sem mæta á fundinn hafa ekki atkvæðisrétt, en er heimilt að öðru leiti að taka að fullu þátt í honum.
Hér má sjá nöfn stjórnarmanna og fulltrúa á aðalfundi LS sem kjörnir voru á aðalfundum svæðisfélaganna, í hvaða nefndum hver og einn mun starfa í og tilnefningu svæðisfélaga til stjórnar LS.
Það skal ítrekað að aðalfundurinn er opinn öllum félagsmönnum LS og eru þeir hér með boðnir velkomnir. Vegna skipulagningar er tilkynning um þátttöku nauðsynleg.
