Upphaf strandveiða 2023 slær öll fyrri met.  Búið er að gefa út 584 leyfi og þegar hafa 469 hafið veiðar.  Afli er að meðaltali 295 tonn á dag, þar af 264 tonn þorskur eða 89%.

Sjómönnum ber saman um að óhemju magn af þorski sé nú á miðunum.  Við því þurfi að bregðast og bæta við heimildum til strandveiða.  Það að 403 bátar séu nú með meira en hálft tonn af þorski í hverjum róðri segir allt sem segja þarf.

Samantekt sýnir að alls 217 aðilar hafa að meðaltali veitt umfram 774 kg af þorski á þeim þrem dögum sem liðnir eru af vertíðinni.   LS beinir því til félagsmanna að virða þau mörk sem sett eru;  að þorskafli í hverjum róðri fari ekki umfram 774 kg.   Þá vekur LS athygli að með þessu háttarlagi eru menn að hafa af félögum sínum möguleika til veiða, þar sem umframaflinn telur inn í útgefinn heildarafla.

Heildarþorskafli að loknum þremur dögum er 792 tonn, þar meðtalinn umframaflinn.